Тăван чĕлхепе культурăна малалла аталантарас тĕллевпе Чăваш Республикин вĕренӳ тата çамрăксен политикин министерстви Чăваш Республикин хĕрарăмсен союзĕпе пĕрле Иван Яковлевич Яковлев çуралнăранпа 175 çул çитнине халалланă «Туслăх хĕлхемĕ» фестиваль ирттерчĕ.
Фестиваль икĕ тапхăрпа иртрĕ: муниципалитет тапхăрĕ тата республика тапхăрĕ. Фестивалĕн пĕрремĕш тапхăрне Чăваш Республикинче тата ун тулашĕнче вырнаçнă вĕренӳ организацийĕсен 1-4-мĕш класĕсенче вĕренекен кашни ача хăй кăмăлĕпе хутшăнма пултарчĕ. Иккĕмĕш тапхăра хутшăнма муниципалитет шайĕнче мала тухнă ачасене ирĕк пачĕç. Жюри пурĕ 116 видеролик пăхса тухрĕ, вĕсен шутĕнче Тутар, Пушкăрт Республикисенчен тата Ульяновск облаçĕнчен пурĕ 20 номер пулчĕ. Ачасем çĕннине пĕлес, хăйсен пултарулăхне кăтартас тесе нумай тăрăшни, педагогсем ачасене май пур таран пулăшни курăнать. Чунра çунакан хĕлхем пурин те палăрать. Паллах, çитменлĕхсем те çук мар. Вĕсене пĕтерес тесен вĕрентекенсен чăваш ташши-юрри хăйне евĕрлĕхне, чăваш тумне тăхăнас уйрăмлăхсене шута илмелле.
Г.Е. Егоров ячĕллĕ Вăрмарти пĕтĕмĕшле пĕлÿ паракан вăтам шкулта 3 класра вĕренекен хĕрачасен ушкăнĕ «Чăваш ташши» номинацире призер пулса тăчĕ.
Фестивале хутшăннă ачасемпе вĕсен вĕрентекенĕсене ĕçĕшĕн, иксĕлми хастарлăхĕшĕн пурне те чĕререн тав тăватпăр, малашне те çитĕнӳсем тума çирĕп сывлăх, çĕнĕ хавха сунатпăр.
Сертификатсем электрон форматпа пулаççĕ, вĕсене заявкăра кăтартнă адреспа ака уйăхĕн 15-мĕшĕччен ярса пама палăртнă.
Йĕркелӳ комитечĕ:
Чăваш Республикин вĕренӳ институчĕн регион аталанăвĕн центрĕ,
телефон: 8(8352)45-99-96
e-mail: chrio4@rchuv.ru